Aprazamento dos XXXII Encontros Estatais LGTBI

A Asociación pola Liberdade Afectiva e Sexual da Coruña anuncia o aprazamento ata o outono do 2021 da celebración dos XXXII Encontros Estatais LGTBI.

A actual situación sanitaria con rebrotes en todo o territorio do Estado e con focos recentes na cidade e na súa contorna, fannos tomar esta difícil decisión que terá tamén o seu impacto na economía da cidade. Estas xornadas son un espazo de encontro e debate, nas que se busca fortalecer os lazos entre as entidades e colectivos LGTBI, polo que celebralos de xeito telemático arrebataríalles todo o seu significado.

Queremos agradecer ao Concello da Coruña, a Deputación da Coruña e a Xunta de Galicia, que dende o inicio apoiaron tanto a nosa candidatura, no mes de novembro de 2019, coma o traballo feito ao longo de todos estes meses. O noso agradecemento tamén a Universidade da Coruña polo apoio mostrado ao proxecto. A participación de todas elas será fundamental para o éxito destes encontros o vindeiro ano.

Desexamos que a situación provocada pola COVID-19, que tanta dor está a causar, remita o antes posible e que poidamos acoller na Coruña uns encontros estatais memorables, onde as persoas participantes poidan gardar un bo recordo das xornadas e da nosa cidade.

¡Haz que llegue a más gente!

Entradas relacionadas