A Asociación pola Liberdade Afectiva e Sexual da Coruña decidiu galardoar co XVII premio Marcela e Elisa a Carolina Iglesias, máis coñecida como “Percebes y Grelos”, Youtuber, guionista, comediante y presentadora. A entrega do premio terá lugar no mes de xuño.
Estes premios foron outorgados durante dez anos polo xa desaparecido colectivo Milhomes, e foron recuperados no 2005 por ALAS A Coruña. Entre as persoas e entidades que foron galardoadas polo labor realizado en prol dos dereitos da comunidade LGTBI destacan a Asociación de Mulleres Deportistas Galegas (MUDEGA) ou a compañía de teatro A Panadaría.
Coa entrega deste galardón a Carolina Iglesias, ALAS A Coruña quere recoñecer a traxectoria dunha muller bisexual, exemplo de visibilidade para a mocidade. Ademais, ten empregado o seu talento artístico en moitas ocasións para contar de primeira man que foi vítima de bullying no instituto, así como para fomentar o coidado da saúde mental.
No mes de xuño, coincidindo co aniversario da voda de Elisa e Marcela, Carolina Iglesias recibirá este premio, o que a converterá na persoa máis nova en recibir o galardón ata a data. Nesta cerimonia tamén se fará entrega do XVI premio Marcela e Elisa ao director de cine e fotógrafo, Lázaro Louzao, xa que a COVID-19 obrigou ao adiamento da entrega do premio o ano pasado.
Con este acto, ALAS A Coruña quere homenaxear de novo ao mundo da cultura, que un ano despois do inicio da pandemia segue inmerso nunha grave crise, ao tempo que reivindica a importancia do feminismo, moi presente nos contidos de Carolina Iglesias.
