Están a ser uns días moi duros para A Coruña. Aínda costa asimilar a nova do asasinato de Samuel e a dor e a indignación son moi grandes. Malia todo, ver onte a praza de María Pita chea ata desbordar esixindo xustiza para Samuel e escoitar os atronadores aplausos conmóvenos e énchenos de esperanza. Pero non só na Coruña escoitouse este berro, que percorreu o noso país de norte a sur e de leste a oeste. A todas as persoas que onte decidíchedes alzar a voz contra os discursos de odio e a violencia contra o colectivo LGTBI, dámosvos as GRAZAS/GRACIAS/ESKERRIK ASKO/GRÀCIES!
Queremos extender todo o noso cariño e apoio ás amigas e amigos de Samuel quen, malia a teren a voz quebrada pola dor, non dubidaron en alzala para relatar a verdade dos feitos fronte a quen relativiza e minimiza a LGTBIfobia. Pero, ademais de para reclamar xustiza, a concentración da Coruña serviu para cumprir coa vontade do pai de Samuel: que a xente colaborase doando alimentos para a Cruz Vermella. As persoas asociadas de ALAS A Coruña foron as encargadas de xestionar os máis de 200 quilos de alimentos que proban que Coruña é unha cidade solidaria.
Dende ALAS A Coruña solicitamos que o Concello da Coruña decrete o loito oficial por este asasinato, que ten conmocionada a toda a cidadanía coruñesa. Ademais, confiamos en que o traballo de investigación dos corpos policiais sirva para levar ás persoas responsables ante la xustiza. Este asasinato non pode quedar impune e dende ALAS A Coruña e o seu observatorio faremos canto sexa necesario para que así sexa.
