A asociación ALAS A Coruña ven de publicar o informe “Sacando as cores”, dedicado á memoria de Samuel Luiz e todas as vítimas da LGTBIfobia. Neste 2021 destaca o incremento dun 70,83% nos incidentes de odio en toda Galicia.
O Observatorio Coruñés contra a LGTBIfobia é un servizo da asociación ALAS A Coruña que contou dende os seus comezos co apoio do Concello da Coruña. Este cuarto informe constata a consolidación do servizo, á vista das 354 atencións a 201 persoas de 15 nacionalidades diferentes, o que comporta un incremento dun 40% nas atencións e dun 76% no número de usuarias beneficiadas. O 64,97% das atencións do 2021 foron realizadas á persoas residentes na cidade da Coruña.
Ao longo dos doce meses que abrangue o informe, rexistráronse 82 incidentes de odio, dos cales 58 poden ser considerados como agresións cara á comunidade LGTBI galega. Esta preocupante cifra de incidentes supón un incremento dun 70,83% con respecto á do 2020. O principal escenario destes incidentes foi a vía pública, seguida moi de lonxe polo eido doméstico. A cidade da Coruña rexistrou a metade dos incidentes (41) recollidos neste informe.
En palabras da presidenta da entidade, Ana G. Fernández “Faise necesario que as institucións galegas traballen de xeito conxunto para lle por freo á desigualdade, ás agresións e aos discursos de odio. Non hai espazo para a indiferenza cando as nosas vidas están en xogo”. Os resultados deste cuarto informe do observatorio debateranse nos XXXII Encontros Estatais LGTBI que se celebrarán na Coruña entre o 21 e o 23 de outubro, organizados por ALAS A Coruña. As inscricións estarán abertas ata o 9 de outubro na
web do evento.
