XIX Premios Elisa e Marcela

A asociación ALAS A Coruña acordou por unanimidade galardoar cos premios Marcela e Elisa 2023 a dous centros educativos, o IES Nº1 de Ribeira e o IES Rafael Dieste da Coruña, polo seu compromiso cos dereitos LGTBI+.

ALAS A Coruña leva dende 2015 entregando estes premios, unha herdanza do desaparecido colectivo Milhomes. Estes galardóns buscan poñer en valor o labor de persoas e entidades en prol dos dereitos LGTBI+, como Fran Barcia (2022), Carolina Iglesias (2021), Trini Falcés (2019) ou o Comité AntiSIDA da Coruña (2015).

ALAS A Coruña outorga por vez primeira estes galardóns a iniciativas no eido educativo, malia que dende a súa fundación esta asociación ten presencia en centros escolares a través dos seus obradoiros de diversidade. O pasado 2022, ALAS A Coruña formou a preto dun millar de persoas, maiormente alumnado e profesorado, grazas ao proxecto Dereito A Saber apoiado pola Deputación da Coruña.

Entre os motivos para outorgar os XIX premios Marcela e Elisa ao IES Nº1 de Ribeira e ao IES Rafael Dieste o xurado valora o compromiso continuo destes centros coa comunidade LGTBI+, máis alá de datas sinaladas, así como o amplo catálogo de libros de temática LGTBI+ dispoñible nas súas bibliotecas. O IES Nº1 de Ribeira apostou fortemente pola formación ao seu equipo docente nunha alianza entre o Concello de Ribeira, o Instituto de Mediación Educativa de Ribeira e ALAS A Coruña. A maiores, este instituto leva dous cursos izando as bandeiras da comunidade LGTBI+ en datas destacadas. Pola súa banda, o xurado salienta do IES Rafael Dieste a creación e o bo funcionamento do grupo de apoio LGTBI+, DiverXentes, así como a aposta do equipo directivo de facer máis inclusivos espazos do centro, como os aseos.

Para dar inicio ás celebracións do Orgullo da Coruña e coincidindo co aniversario da voda de Elisa e Marcela, ALAS A Coruña entregará no mes de xuño estes premios.

¡Haz que llegue a más gente!

Entradas relacionadas