A asociación ALAS A Coruña, dentro das actividades enmarcadas no Orgullo LGTBI+ 2023 da Coruña, organiza un faladoiro sobre a Lei LGTBI+ no que participará o vicepresidente da Federación Estatal de Lesbianas, Gais, Trans, Bisexuais, Intersexuais e máis (FELGTBI+), Mané Fernández. O acto terá lugar o xoves, 8 de xuño ás 19:00, no Centro Cívico da Cidade Vella.
A Lei Estatal LGTBI+ foi aprobada en marzo deste ano polas Cortes, tras un longo proceso de negociacións que se remonta ao ano 2017. Durante todo este tempo, a FELGTBI+ foi un actor imprescindible para sacar adiante esta lexislación devolvendo a España a un posto de liderazgo internacional en materia de dereitos LGTBI+, tal e como se constata no ránking Rainbow Europe publicado por ILGA Europa, no que España ocupa a 4ª posición.
O actual vicepresidente da FELGTBI+, Mané Fernández, dende diferentes postos dentro da Comisión Executiva da Federación, participou en todas as leis que ampliaron dereitos á comunidade LGTBI+: o cambio no Código Civil que permitiu a consecución do matrimonio igualitario (2005), a Lei Trans 2007 ou a recente Lei LGTBI+. Precisamente sobre esta última versará a súa intervención este xoves, 8 de xuño ás 19:00, no Centro Cívico da Cidade Vella.
Neste faladoiro, Mané Fernández compartirá co público como se desenvolverón as negociacións desta lei, como está a ser a súa implementación nos diferentes territorios do Estado, así como o posible impacto que pode ter un cambio de goberno nos dereitos da comunidade LGTBI+. Fernández estará acompañado de persoas asociadas a ALAS A Coruña que aportarán a súas vivencias e reflexionarán sobre como esta nova lexislación esta a mudar o seu día a día.
