A asociación LGTBI+, ALAS A Coruña, convoca a toda a cidadanía a sumarse á manifestación do día 28 de xuño, que partirá ás 19:30 da praza de Ourense e rematará coa lectura do manifesto na praza de María Pita.
Baixo o lema Orgullo LGTBI+: Revoltas do pasado, celebración do presente e conquistas de futuro, a asociación quere facer fincapé no carácter reivindicativo e político destas datas nas que rememoramos os disturbios de Stonewall, nos que as protagonistas foron mulleres trans, racializadas e traballadoras sexuais.
Este 2023, o asociacionismo LGTBI+ está de celebración trala aprobación en marzo da Lei LGTBI que supuxo un avance significativo en materia de dereitos humanos para toda a sociedade española. Porén, todavía quedan moitos por lograr, como unha maior protección para as personas LGTBI+ migrantes ou refuxiadas.
Malia isto, neste 2023 a comunidade LGTBI+ tamén se enfronta a unhas eleccións xerais nas que se está a xogar moito, debido á crecente normalización dos discursos de odio desde diferentes institucións e partidos. Ante as ameazas da dereita de derrogar, ou non garantir, os dereitos acadados coa Lei LGTBI que está en proceso de implementación, desde ALAS A Coruña pídese á cidadanía que participe de forma masiva na manifestación do 28 de xuño que sairá ás 19:30 da praza de Ourense.
En palabras da presidenta de ALAS A Coruña, Ana G. Fernández: “É crucial que toda a ciudadanía tome as rúas en defensa dos avances sociais conquistados e que fan da nosa sociedade unha das máis plurais do mundo. Ante a chamada ás urnas do 23X, a cidadanía non debe esquecer que partidos son os que garantizan os dereitos das minorías. Polo tanto, exercer o dereito ao voto é máis importante que nunca”.
