Boas tardes A Coruña! Queremos agradecer primeiro a toda a xente que estades hoxe aquí connosco, reivindicando os nosos dereitos, celebrando a diversidade e servindo pluma.
Estamos hoxe aquí ALAS A Coruña, ARELAS, CASCO e CORUFEST xuntas, facéndolle fronte aos discursos de odio, aos bulos, ás violencias LGTBIfóbicas e orgullosas de representar ás cores da liberdade e a diversidade.
Este ano queremos reivindicar a importancia da educación na nosa sociedade como ferramenta fundamental para combater o odio contra a diversidade. Nun contexto marcado pola violencia internacional, os discursos de odio e a involución dos Dereitos Humanos, alzamos a voz por unha educación verdadeiramente inclusiva para todas, todes e todos.
Esiximos que nos centros formativos se traballe para eliminar e cuestionar os discursos de odio.
Esiximos a eliminación do pin parental, por ser un intento de censurar e perseguir á diversidade LGTBI+ nos centros educativos.
Reclamamos formación para toda a comunidade educativa en materia de diversidade, para que o alumnado, o profesorado e demais persoal do sistema educativo poida estudar, desenvolver a súa labor e, en definitiva, convivir en centros seguros e libres de violencias.
Esiximos á Xunta a creación e implementación de unidades de atención á diversidade LGTBI+ nos centros educativos de todos os niveis, incluído o universitario.
Mais a educación no é o único que esiximos neste Orgullo. Ante os bulos e a desinformación contra as persoas LGTBI+ e especialmente contra as persoas trans, que ven como cada día os medios de comunicación difunden bulos e mentiras sobre as súas identidades, seguimos a reclamar a posta en marcha de políticas públicas por parte dos gobernos e institucións que protexan á nosa comunidade do odio, da discriminación e a violencia.
Porque as nosas vidas non son unha oportunidade de negocio e os nosos dereitos non poden ser comercializados. Os Orgullos non poden ser organizados desde as concellerías de turismo, a nosa comunidade merece respecto e dignidade, e, mentres algúns pretenden relacionarnos a nós e ao Orgullo con festa e alcohol, a realidade que vivimos desde as entidades non ten nada de festiva, atendendo cada día a persoas e desenvolvendo o nosos proxectos cunha limitación de recursos que cada día fai máis difícil manter a nosa labor nunhas condicións dignas, tanto para as persoas traballadoras como para as usuarias. As asociacións non molaremos tanto como Chanel e os únicos pelícanos que nos gustan son os que teñen plumas coma nos, pero o noso traballo non é posible sen a implicación das institucións. Por iso, reclamamos a creación de liñas de axudas específicas para proxectos de intervención social dirixidos á comunidade LGTBI.
Non esquezades que o Orgullo comezou como unha revolta violenta. O Orgullo foi, é, e será, unha revolución! Un acto de rebeldía ante unha sociedade que nos quere devolver ao armario! O Orgullo é loita e reivindicación!
A nosa loita non queda só no mes de xuño, existimos os 365 días do ano, e a que non lle guste, que se volva á súa caverna porque a comunidade LGTBI da Coruña ten loita para rato.
