A asociación LGTBI+ ALAS A Coruña instalará un posto informativo este sábado, 29 de xuño, na praza de Lugo (A Coruña) entre as 11:00 e as 15:00.
No marco da campaña Liberdade de Ser e Sentir, impulsada pola Deputación da Coruña, ALAS A Coruña estará este sábado informando ao conxunto da cidadanía sobre a realidade da comunidade LGTBI+ en Galicia. Nesta carpa informativa, a poboación terá a posibilidade de formular as súas dúbidas e consultas no tocante á diversidade, así como ter acceso de balde aos folletos sobre o coidado da saúde sexual e materiais profilácticos.
A educación en diversidade tamén terá un papel destacado no posto informativo, xa que a mocidade poderá aprender sobre os dereitos da comunidade LGTBI+ mediante a guía didáctica Os mundos de PINDI
, que a asociación emprega nas súas formacións en institutos ao longo do curso escolar, grazas ao apoio da institución provincial ao seu proxecto Dereito a Saber.
As accións de Liberdade de Ser e Sentir van máis aló deste punto informativo, demostrando que o Orgullo LGTBI+ non se limita ao mes de xuño. Ata final de ano, ALAS A Coruña organizará obradoiros sobre diversidade LGTBI+ en diferentes concellos da provincia adheridos á campaña, como Betanzos ou San Sadurniño.
