A pasada fin de semana, ALAS A Coruña, como entidade membro da Federación Estatal de Lesbianas, Gais, Trans, Bisexuais, Intersexuais e máis (FELGTBI+), participou no X Congreso desta organización. No mesmo, dous integrantes de ALAS A Coruña, Óscar Rodríguez e Martina Roel, foron reelixidos como vogal de Relacións Exteriores e coordinadora de mocidade desta federación respectivamente
Entre o 18 e o 20 de outubro celebrouse en Madrid o X Congreso da FELGTBI+ baixo o lema: Transformemos la sociedad, construyamos un futuro en igualdad. Máis de 50 delegacións de entidades LGTBI+ de todo o Estado debateron sobre os retos e as liñas estratéxicas que afrontará a comunidade LGTBI+ nos vindeiros tres anos, data na que terá lugar de novo este evento.
A celebración do X Congreso da FELGTBI+ serviu como despedida de Uge Sangil como presidenta da organización máis importante do activismo LGTBI+ estatal, tras case sete anos e con importantes logros, como a aprobación da Lei Estatal LGTBI ou o pulo ao Pacto de Estado fronte aos discursos de odio.
Durante os próximos tres anos, Paula Iglesias será a encargada de presidir esta federación. No seu equipo contará con Óscar Rodríguez, socio de ALAS A Coruña, como vogal de Relacións Exteriores, cargo que xa viña ocupando dende outubro do 2021 ata outubro de 2024. A maiores, a tamén socia de ALAS A Coruña, Martina Roel, será a encargada de coordinar e dinamizar o grupo de mocidade da FELGTBI+. A todos estes nomeamentos hai que lles sumar o de Marta Alonso, socia de Nós Mesmas, entidade de mulleres LTB de Vigo, como secretaria de actas, incrementando notablemente a influencia galega no seno da entidade LGTBI+ máis relevante do Estado e unha das máis importantes a nivel internacional.
