ALAS A Coruña instalará 8 puntos informativos en festivais da provincia no marco da campaña Liberdade de Ser e Sentir da área de Igualdade da Deputación da Coruña.
A asociación LGTBI+ ALAS A Coruña poñerá en marcha un total de oito puntos informativos en festivais e festas populares da provincia, no marco da campaña Liberdade de Ser e Sentir, impulsada ao longo de todo o ano pola Deputación da Coruña para a defensa dos dereitos da comunidade LGTBI+.
O obxectivo é sensibilizar, informar e achegar recursos ao conxunto da cidadanía sobre a diversidade afectiva, sexual, de xénero e familiar, promovendo espazos seguros, inclusivos e libres de LGTBIfobia durante eventos culturais e musicais do verán.
Os postos estarán atendidos por persoal da entidade que ofrecerá materiais informativos, formativos, xogos e materiais vencellados ao coidado da saúde sexual.
Ata o momento, xa están confirmados seis dos oito eventos nos que estará presente a campaña durante estes meses de verán:
- Venres, 8 de agosto – 22:00 | Carballeira de Zas
- Sábado, 9 de agosto – 21:00 | Castelo Rock (Muros)
- Venres, 15 de agosto – 13:30 | A Xunqueira (Cee)
- Luns, 18 de agosto – 22:00 | Festas de San Roque (Betanzos)
- Sábado, 23 de agosto – 22:00 | Festival Irmandiño (Moeche)
- Venres, 5 de setembro – 21:00 | Festival Rock in Rian (Rianxo)
As dúas datas restantes serán anunciadas nas vindeiras semanas.
Con esta iniciativa, ALAS A Coruña e a Deputación reafirman o seu compromiso coa igualdade, a diversidade e os dereitos humanos, levando a mensaxe de respecto, liberdade e orgullo aos espazos festivos da provincia.
