A asociación LGTBI+ ALAS A Coruña celebra con enorme satisfacción a sentenza emitida por unanimidade polo Tribunal Superior de Xustiza de Galicia (TSXG), que estima o recurso presentado pola entidade fronte á resolución da Xunta de Galicia que denegaba a declaración de utilidade pública. Esta decisión xudicial recoñece o valor do traballo que a asociación leva desenvolvendo desde 2010 na defensa dos dereitos da comunidade LGTBI+.
Para a entidade, o fallo supón un importante respaldo a unha traxectoria de máis de quince anos dedicados á defensa activa dos dereitos humanos. Como sinala a presidenta de ALAS A Coruña, Ana G. Fernández: “Esta sentenza é un motivo de celebración para toda a comunidade LGTBI+. Confirma que o noso traballo ten un impacto real e que o noso compromiso co interese xeral está acreditado desde hai anos”.
ALAS lembra que a resolución non é aínda firme e que a Xunta dispón da posibilidade de presentar recurso de casación ante o Tribunal Supremo. Aínda así, a entidade transmite unha mensaxe de esperanza: “Confiamos en que este proceso culmine co recoñecemento de utilidade pública porque, como sinala a sentenza, ALAS achega un beneficio incuestionable á sociedade galega”, destaca a súa presidenta.
De materializarse a declaración de utilidade pública, ALAS A Coruña converteríase na primeira entidade LGTBI+ de Galicia en alcanzar este recoñecemento, un fito especialmente relevante tras un proceso iniciado en novembro de 2023. A asociación subliña que actuou sempre de boa fe, esgotando todas as vías administrativas antes de recorrer aos tribunais, e que o fixo unicamente coa motivación de dotar o seu labor dunha maior transparencia
Neste sentido, ALAS subliña que a obtención da utilidade pública permitirá reforzar a confianza da cidadanía, das institucións e do tecido empresarial: “A utilidade pública é un exercicio de transparencia que reforza a nosa credibilidade. Agardamos que este paso anime a máis persoas e entidades a colaborar coa nosa misión de construír unha Galicia máis diversa e igualitaria”, afirma Ana G. Fernández.
ALAS A Coruña agradece o apoio de todas as persoas, de maneira especial ás súas asociadas e ao seu equipo legal, así como doutras organizacións sociais e empresas colaboradoras que acompañaron á entidade neste proceso, e reafirma a súa vontade de seguir traballando por unha sociedade baseada nos valores da igualdade, o feminismo e a diversidade.
