Historia

Historia activismo LGTBI A Coruña
2010 – Primeiro Orgullo no que ALAS A Coruña participou

Facendo historia no activismo LGTBI da Coruña

A historia do activismo LGTBI comezou a súa andaina na Coruña a finais dos anos 80 coa fundación do colectivo Milhomes. Este rescatou o nome do primeiro personaxe gai da literatura galega creado polo escritor e xornalista, Eduardo Blanco Amor, para a súa novela A Esmorga

No ano 2005, disolveuse este colectivo pioneiro na loita polos dereitos LGTBI na Coruña. Atopabámonos a comezos do novo milenio e sen unha organización que defendese a nosa comunidade a nivel local. Daquela, un grupo de persoas decidiron constituírse en asociación sen ánimo de lucro, inspirándose no modelo de ALAS Lugo e do anteriormente citado, Milhomes.

Fundación

Coa aprobación dos Estatutos no inverno do 2010, formalízase o nacemento da nosa entidade: a Asociación pola Liberdade Afectiva e Sexual da Coruña. As primeiras xuntanzas, baixo a presidencia de Vanessa Almeida Conde, tiveron lugar no Fórum Metropolitano. Pronto substituímos este espazo polo bar O Alfaite, gozando deste xeito dunha maior flexibilidade horaria. Entre as actividades iniciais, compre destacar as charlas sobre diversidade en institutos da cidade ou cine-forums. También colaborouse coa corporación municipal para a posta en marcha do agora extinto servizo de mediación LGTBI.

Pouco a pouco a nosa entidade foi medrando, tanto en número de persoas asociadas como na variedade de actividades. No 2015, ALAS A Coruña entra a formar parte da FELGTB, entidade na que seguimos traballando en rede con outros colectivos do Estado.

Presente

Así, e seguindo esta liña ascendente, no ano 2017 ponse en marcha o Observatorio Coruñés contra a LGBTIfobia, grazas ao apoio do Concello da Coruña. Este servizo está adicado á escoita, ao asesoramento, ao rexistro e á denuncia dos incidentes ou delitos de odio con unha compoñente LGTBIfóbica.

Finalmente, no 2019 participamos en proxectos internacionais en Finlandia e Estonia, o que permitíunos entrar en contacto con asociacións LGTBI europeas. Por iso, ALAS A Coruña ingresou coma membro nas federacións internacionais IGLYO e ILGA, en febreiro de 2020.

Co apoio da cidadanía seguiremos defendendo unha sociedade máis igualitaria. Sigamos facendo historia no activismo LGTBI da Coruña e en lugares máis lonxanos!

error: Este contenido está protegido. Este contido está protexido.