O Observatorio Coruñés contra a LGTBIfobia é un servizo adicado á escoita, ao asesoramento, ao rexistro e á denuncia dos incidentes ou delitos de odio con unha compoñente LGTBIfóbica. O anonimato e a gratuidade son a base do noso traballo.
Outra das nosas máximas é que o servizo estea a disposición de toda a poboación, independentemente da súa orientación sexual ou identidade de xénero. Atendemos numerosos casos de persoas que queren saber de que xeito apoiar máis e mellor á comunidade LGTBI.
Dacordo cun estudo da FRA, o 90% dos delitos e incidentes de odio quedan sen denunciar. Isto revela dous problemas: por unha banda a situación de desamparo das vítimas; pola outra, a falta de datos actualizados nesta materia.
Os diferentes observatorios espallados polo territorio nacional, malia os seus escasos recursos, tratan de visibilizar esta discriminación e demandar ás administracións a implementación de políticas que garden á comunidade LGTBI.
A súa orixe
Este servizo nace a finais do ano 2017 como resposta a varios casos de acoso escolar e á agresión sufrida por un socio. Apoiado dende os seus comezos polo Concello da Coruña e xestionado pola nosa asociación, facilita a comunicación entre as administracións e as vítimas.
O observatorio inspírase noutros modelos coma o OCH ou o Observatorio madrileño contra la LGTBfobia. Grazas a que un dos seus voluntarios asociouse a ALAS A Coruña, decidimos por en marcha un proxecto similar. Así, o noso observatorio foi o primeiro destas características en Galicia e no noroeste da península.
O seu resultado
De maneira anual, o observatorio presenta un informe sobre o seu labor e emite recomendacións para mellorar a vida das persoas LGTBI. Cumprimos así a nosa débeda coa sociedade, pois este servizo finánciase fundamentalmente con fondos públicos. É por isto que cremos firmemente neste exercicio de transparencia.
Traballo en rede
A maiores, o Observatorio Coruñés contra a LGTBIfobia pertence a rede estatal de observatorios, Redes contra el odio, coordinada pola FELGTBI+; onde comparte os seus datos a nivel nacional.
