Coincidindo co segundo aniversario do asasinato de Samuel Luiz, a asociación LGTBI+, ALAS A Coruña, organizará unha vixilia o luns, 3 de xullo ás 20:00 na Avenida de Bos Aires, ao carón da discoteca Playa Club.
ALAS A Coruña, entidade que exerce a acusación popular no caso de Samuel Luiz, organiza por segundo ano consecutivo un acto en lembranza da memoria deste, así como doutras vítimas da LGTBIfobia. A asociación convoca a toda a cidadanía a sumarse a un minuto de silencio para posteriormente realizar unha ofrenda floral no lugar onde sucederon os feitos.
Ao tratarse dun acto de homenaxe, a asociación no fará lectura de ningún manifesto co fin de respectar o proceso xudicial do que ALAS A Coruña é parte. Desde a organización prégase a todas as personas que acudan ao mesmo que garden o debido respecto que merece a memoria de Samuel Luiz.
Nesta data tan sinalada, a presidenta de ALAS A Coruña, Ana G. Fernández manifesta “a necesidade de que a cidadanía non esqueza este crime nin as consecuencias que teñen os discursos de odio”, ademáis “festexando e lembrando a vida de Samuel, así como a doutras vítimas anónimas da LGTBIfobia, facemos de nosa cidade un lugar máis seguro e habitable”.
