ALAS A Coruña organiza un debate en torno ás propostas en materia de dereitos LGTBI+ dos partidos con representación no Parlamento de Galicia de cara á cita coas urnas o 18 de febreiro. Este debate terá lugar no salón de actos da Fundación ONCE da Coruña o xoves, 8 de febreiro ás 19:30.
Durante os anteriores comicios, marcados pola emerxencia sanitaria da COVID-19, ALAS A Coruña veuse na obriga de organizar faladoiros empregando os directos da súa canle de Instagram. Catro anos máis tarde, a situación da comunidade LGTBI+ mudou, e dende a asociación consideran prioritario abordar cara a cara neste debate tres amplos temas: a educación en diversidade, os servizos da sanidade pública en relación ás persoas LGTBI+ e as políticas públicas e do benestar vencelladas a esta comunidade. A maiores, o público asistente terá a oportunidade de formular preguntas ás representantes dos partidos e estas últimas contarán, ao final do acto, cun “minuto de ouro”.
Todos os partidos con representación no Parlamento de Galicia aceptaron o convite de ALAS A Coruña para participar neste debate e estarán representados por:
- Iria Carreira, nº6 da lista do BNG pola provincia da Coruña.
- Gonzalo Trenor, nº10 da lista do PPdeG pola provincia da Coruña.
- Aitor Bouza, nº4 da lista do PSdeG pola provincia da Coruña.
A asociación agradece a estas tres forzas políticas a súa participación e busca con este debate situar na axenda lexislativa do novo parlamento galego os temas que preocupan á comunidade LGTBI+. Coa celebración do debate na sede da Fundación ONCE, a entidade quere deixar patente a necesidade de traballar dun xeito interseccional entre organizacións sociais. En palabras da presidenta de ALAS A Coruña, Ana G. Fernández: “A comunidade LGTBI+, ao igual que outros colectivos vulnerables, ten que participar masivamente o 18F para garantir uns bos servizos públicos que non deixen a ninguén desamparado” igualmente afirmou que “A lei LGTBI estatal obriga ao próximo goberno da Xunta a adaptar a lexislación propia para garantir o benestar dunha parte da cidadanía moi esquecida”.
